ბოლო ამბები
მაისი 21, 2024

29 აპრილის შეკრებამ სრული ისტერია გამოიწვია ფსევდო ლიბერალებში, „ნაცმოძრაობაში“ – მამუკა მდინარაძე

აპრ23,2024
გაზიარება

გარანტიას ვაძლევ ამ ისტერიის ავტორებს, რომ საჯარო მოხელეებიც იქნებიან იქ [შეკრებაზე] და სხვა მოქალაქეებიც, ორჯერ და სამჯერ მეტი. ჩვენი და პირადად ჩემი დავალებაა ჩვენი პარტიული დანაყოფების მიმართ, რომ თუ ვინმეს წამოსვლა უნდა აქციაზე, უზრუნველყონ მათი ორგანიზებულად წამოსვლა თბილისში, – განაცხადა „ქართული ოცნების“ აღმასრულებელმა მდივანმა ლიდერმა მამუკა მდინარაძემ 29 აპრილის შეკრებასთან დაკავშირებით „ნაციონალური მოძრაობის“ წევრ გიგი უგულავას განცხადების კომენტირებისას.

უგულავამ 29 აპრილს „ქართული ოცნების“ მიერ დაანონსებული შეკრების შესახებ განაცხადა – „ვნახოთ როგორ მიატოვებენ უსინდისო მასწავლებლები ბაღებსა და სკოლებში მოსწავლეებს“.

„29 აპრილის შეკრებამ სრული ისტერია გამოიწვია ფსევდო ლიბერალებში, „ნაცმოძრაობაში“, რადიკალურ ოპოზიციაში. ხდება მათი [„ქართული ოცნების“ მხარდამჭერების] პირდაპირი შეურაცხყოფა და გაშავება. ახლა დასდევენ საჯარო მოხელე იქნება, თუ არა. ხალხო, საჯარო მოხელე ერთ პოსტს რომ დადებს, ხელისუფლების საწინააღმდეგოს, ერთი-ორი ვინმე რომ გამოჩნდება სოციალურ ქსელებში, ან აქციაზე, მთელი კამპანია აქვთ ხოლმე აგებული, საჯარო მოხელე პროტესტს უცხადებსო. ვერ წარმოუდგენიათ, რომ საჯარო მოხელეს შეუძლია პროტესტიც გამოუცხადოს ხელისუფლებას და მხარიც დაუჭიროს. ესენი ადამიანები არ არიან?! გარანტიას ვაძლევ ამ ისტერიის ავტორებს, რომ საჯარო მოხელეებიც იქნებიან იქ [შეკრებაზე] და სხვა მოქალაქეებიც, ორჯერ და სამჯერ მეტი. დიახ, პარტიული დავალებაა, რომ პარტიის წარმომადგენლები, საჯარო მოხელეები იქნებიან, თუ არ იქნებიან, ორგანიზება მოხდეს.

ჩვენი და პირადად ჩემი დავალებაა ჩვენი პარტიული დანაყოფების მიმართ, რომ თუ ვინმეს წამოსვლა უნდა აქციაზე, უზრუნველყონ მათი ორგანიზებულად წამოსვლა თბილისში. მიზანი არის, რომ დავანახოთ ვინ უჭერს სწორ, ეროვნულ პოლიტიკას – გამჭვირვალობას, რეალურ დემოკრატიას, რეალურ ევროპელობას მხარს და რას უკრძალავენ ან საჯარო მოხელეებს, ან მასწავლებლებს?! თუ ვინმეს უნდა იმ დღეს მაგალითად რაიონიდან წამოსვლა, დაწერს შვებულებას და წამოვა. თუ არ უნდა, ტელეკამერების მეშვეობით მივმართავ – ერთი ადამიანის დარწმუნებაც არ სცადოს ჩვენმა პარტიულმა აქტივმა, რომ წამოიყვანონ ვისაც ამის სურვილი არ აქვს. ახლა იმ ხალხის გაშავებას ყველამ თავი დაანებეთ და კეთილი ინებეთ, პატივი ეცით საჯარო მოხელესაც, იმ ადამიანსაც, ვინც საჯარო მოხელე არ არის. ყველა კატეგორიის ადამიანი იქნება – ახალგაზრდაც, ხანში შესულიც, შუახნისაც და ეს იქნება სრული ფიასკო იმ ნარატივისა, თითქოს ხალხს რაღაც უნდა და უპირისპირდებიან აქციითო. ეროვნულ ინტერესებს ვერც რუსულს დაარქმევს ვინმე, ვერც ჰომოფობიას და ის ხალხი, საჯარო მოხელეებიც, პედაგოგებიც, ახალგაზრდებიც, სტუდენტებიც, პენსიონერიც, მხარს დაუჭერს ეროვნულ პოლიტიკას – მამულს, ენას და სარწმუნოებას. ეს იქნება ქართველი ხალხის მკაფიო გზავნილი“, – განაცხადა მამუკა მდინარაძემ 23 აპრილს, ჟურნალისტებთან საუბრისას.

ამ თემაზე:

გიგი უგულავას შეფასებით, 29 აპრილს, “ქართული ოცნების” აქციაზე გოდრით მიყვანილი ხალხი” იქნება

სხვა ამბების წაკითხვა