გავრილოვის სკანდალი – მათთვის, ვინც ჯერაც ვერ გარკვეულა პროვოკაციის ანატომიაში

707
წაკითხვა/ნახვა
IMG.GE

დიმიტრი ლორთქიფანიძე 20-21 ივნისს განვითარებულ მოვლენებზე საუბრობს

“ძალიან დამარცვლით და გასაგებად მინდა ავხსნა მათთვის, ვინც ჯერაც ვერ გარკვეულა პროვოკაციის ანატომიაში, თუ რაში გამოიხატება ის.. პირველ რიგში, როგორც მართლმადიდებლობის საპარლამენტთაშორისო ასსამბლეისადმი მიერთებისა და ქართული დელეგაციის შექმნის ინიციატორმა 2011 წელს, მე-7 მოწვევის პარლამენტში, კარგად ვიცი სტრუქტურა და ასამბლეის მუშაობის ფორმატი, გამომდინარე იმ პროტოკოლიდან , რომლითაც ფორუმის სამდივნო მუშაობს ეროვნული პარლამენტების ადმინისტრაციებთან.

მთავარი და გასათვალისწინებელი არის ის გარემოება, რომ დელეგაციის ფორმირება ამა თუ იმ ასამბლეაში, ხდება შესაბამისი კვოტით და მასში მონაწილეობას ღებულობენ საპარლამენტო უმრავლესობა-უმცირესობისა და ცალკეული ფრაქციების წარმომადგენლები.

ეს კი იმას ნიშნავს, რომ ასსამბლეის სხდომა თბილისში, რომელიც ჯერ კიდევ 2018 წლის 28 ივნისს დაიგეგმა და გადაწყდა ჩატარების ადგილი, ცნობილი იყო ქართული დელეგაციის უკლებლივ ყველა წევრისთვის, შესაბამისად, ოცნების, ნაცებისა და ევრონაცების წარმომადგენლებისთვის ამ დელეგაციაში! მათთვის, რა თქმა უნდა ისიც ცნობილი იყო, რომ ამ ორგანიზაციის პრეზიდენტი ამ მომენტისთვის როტაციული წესით იყო რუსეთის გოსდუმის წევრი, სერგეი გავრილოვი, რომლის გარეშეც სხდომა ვერ ჩატარდებოდა, რადგან ის, როგორც მოგახსენეთ უმაღლესი არჩევითი თანამდებობის წევრი იყო ამ ასამბლეაში და მისი ოფიციალური შეხვედრების ამსახველი არაერთი ფოტო იხილა ქართულმა საზოგადოებამ, მათ შორის დღევანდელი ევრონაცების წარმომადგენელ გიგი წერეთელთან.

დელეგაცია მართლაც ჩამოვიდა 24 ქვეყნის წარმომადგენელ პარლამენტართან ერთად , რომელთა შორისაც იყვნენ რუსი დეპუტატებიც. ისინი ჩამოვიდნენ, ყოფილი პრეზიდენტის რეზიდენციაში, ანუ ცერემონიების სასახლეში. მათ მიღებაც პროტოკოლური გაუმართეს, რასაც არც საზეიმო განწყობა აკლდა და არც საქმიანი დატვირთვა და მეორე დღეს, წესისამებრ მიიწვიეს საქართველოს პარლამენტში, გამწესრიგებელი სხდომის ჩასატარებლად.

პარლამენტის ადმინისტრაციისა და შესაბამისად პროტოკოლის გადაწყვეტილებით სამუშაო სივრცედ შეირჩა პლენარულ სხდომათა დარბაზი და პრეზიდიუმში ადგილი განისაზღვრა, როგორც ზაქარია ქუცნაშვილი ამბობს, ერთი სავარძლით სპიკერისთვის, რომელიც თავის მხრივ უნდა ყოფილიყო არა პრეზიდენტი გავრილოვი, არამედ გენერალური მდივანი, საბერძნეთიდან.

დაუკვირდით რას ამბობს თავის ჩვენებაში ქუცნაშვილი: ყველაფერი შეთანხმებული იყო და ყურადღება ვერ მივადევნე, თუ როგორ აღმოჩნდა მეორე სავარძელი სპიკერის გვერდითო და მასში კი პრეზიდენტი გავრილოვიო(!)არა და სხდომა გაიხსნა და გახსნიდან რამდენიმე წამში შემოვარდნენ ეგზალტირებული ქართველი დეპუტატები, კაკო ბობოხიძე, ირმა ნადირაშვილი, გიორგი კანდელაკი და დროშა შემოხვეული ელენე ხოშტარია, რომლებმაც ამ სიტყვის პირდაპირი მნიშვნელობით თავზე დაამხეს ყველაფერი ასსამბლეის დელეგატებს,- პრეზიდიუმიდან ლანძღეს ,თათხეს, წყალი ასხეს, აფურხეს და გამოდევნეს, – სხდომა ჩაშალეს!

ამის შემდეგ, დაიწყო ის , რაც დაიწყო და ძალიან მალე ააფრიალეს პლაკატები, ოპერატიულად ჩართეს იქვე, პარლამენტის ერთ-ერთ სართულზე მოყუჩებული რ2 ის გადამღები ჯგუფი და მოწოდებებიც გახურდა.

ყველაფერი იმდენად სწრაფად განვითარდა, რომ სანამ განსაკუთრებულ დავალებათა დეპარტამენტის პოლიციელთა პირადი შემადგენლობის დისლოცირება სამგორიდან მთაწმინდამდე განხორციელდებოდა, რუსთაველი ხალხით გაივსო და მალევე დატრიალდა ის ტრაგედია რასაც 310 ადამიანის და მათ შორის 84 პოლიციელის ჰოსპიტალიზება მოყვა სხეულის დაზიანებებით!

იმედია, საზოგადოება მალე გააკეთებს დასკვნებს მომხდართან დაკავშირებით. მანამდე კი ერთს ვიტყვი, რომ არჩევანი ხალხსა და დამნაშავეებთან კოჰაბიტაციას შორის ყოველთვის ასეთი კრახითა და სრული დისკრედიტაციით დამთავრდება ხელისუფლებისთვის, ვინც არ უნდა ფლობდეს მას! ჯერი საზოგადოებაზეა!” – წერს დიიმიტრი ლორთქიფანიძე.

თქვენი კომენტარი?
IMG.GE