საქართველოს მოსახლეობას უფლება აქვს, იცოდეს, რა ფული შემოდის ქვეყანაში და იხარჯება პოლიტიკურ საკითხებში, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
პაპუაშვილს კითხვა დაუსვეს ელჩების განცხადებებზე, რომლებიც ევროკავშირის მხრიდან საქართველოს მთავრობისადმი პირდაპირი დახმარების შეჩერების საკითხს ეხება.
„ჩვენ ხომ უნდა შევხედოთ, რა მოჰყვა საბაბად ამ გადაწყვეტილებას. საბაბი არის ის, რომ საქართველოს მოსახლეობა დაინტერესდა, სად მიედინება გრანტით შემოსული თანხები, რა მიზნებს ხმარდება, რომელ ორგანიზაციებში რა თანხები მიდის. თანხები გრანტების სახით შემოდის საფრანგეთიდან, დიდი ბრიტანეთიდან, პოლონეთიდან, ფინეთიდან თუ შვედეთიდან, რომელი ქვეყანაც არ უნდა იყოს. ამ ინტერესმა გამოიწვია სწორედ ეს რეაქცია. დაინტერესდით? ჩვენი გამჭვირვალობა თუ გინდათ, მაშინ საერთოდ აღარ ჩავრიცხავთ თანხებსო. ასეთი პოზიცია სამწუხაროა. ელემენტარული საკითხი, რომელიც არის საფუძველთა საფუძველი როგორც ქვეყნის შიგნით განვითარების, ისე ქვეყნებს შორის ურთიერთობის, ეს არის გამჭვირვალობა. საქართველოს მოსახლეობას, ისევე როგორც ფრანგს, გერმანელს, ფინელს, ამერიკელს, დიდ ბრიტანელს, უფლება აქვს, იცოდეს, რა ფული შემოდის თავის ქვეყანაში და იხარჯება პოლიტიკურ საკითხებში, პოლიტიკაზე გავლენისთვის და ასე შემდეგ. უნდა იცოდეს, რა თანხა შემოდის და სად მიდის. როგორც ჩანს, ვიღაცას ქართველი ხალხი თვალში ეპატარავება“, – განაცხადა შალვა პაპუაშვილმა.
საქართველოში ევროკავშირის ელჩმა, პაველ ჰერჩინსკიმ განაცხადა, რომ გაყინულია 30 მილიონი ევრო, რომლის გადარიცხვას ევროკავშირი საქართველოს თავდაცვის სამინისტროსთვის გეგმავდა. მისივე თქმით, გაერთიანების პირდაპირი მხარდაჭერა საქართველოს მთავრობისადმი ეტაპობრივად შემცირდება და მიმართული იქნება სამოქალაქო საზოგადოების, მედიის მხარდასაჭერად.
Multimedia.ge-ს დამფუძნებელი და მთავარი რედაქტორი.
ინტერნეტ რესურსი 2018 წლიდან ფუნქციონირებს