სხვადასხვა ქვეყნის სახელმწიფოების ლიდერები შეშფოთებას გამოთქვამენ დონალდ ტრამპის მიმართ თავდასხმასა და მკვლელობის მცდელობაზე

ჩინეთის პრეზიდენტი სი ძინპინი: „ჩინეთი შეშფოთებულია ყოფილი პრეზიდენტის, დონალდ ტრამპის მიმართ სროლით. პრეზიდენტმა სი ძინპინმა თანაგრძნობა გამოუცხადა ყოფილ პრეზიდენტ ტრამპს“, – განაცხადა საგარეო საქმეთა სამინისტროს წარმომადგენელმა.

ნატოს გენერალური მდივანი იენს სტოლტენბერგი: „შოკირებული ვარ ყოფილი პრეზიდენტის ტრამპის მკვლელობის მცდელობით. ვუსურვებ მას სწრაფ გამოჯანმრთელებას და ჩემი ფიქრები დაზარალებულებთანაა. მე ვგმობ ამ თავდასხმას. პოლიტიკურ ძალადობას ადგილი არ აქვს ჩვენს დემოკრატიულ ქვეყნებში“.

ირლანდიის პრემიერ მინისტრი საიმონ ჰარისი: „ის, რაც წუხელ ვნახეთ პენსილვანიიდან, საშინელი და არასწორი იყო. შვებაა, რომ ყოფილი პრეზიდენტი ტრამპი უსაფრთხოდ არის და გადაურჩა მკვლელობის მცდელობას. ჩვენი გული მოკლულ და მძიმედ დაშავებულ უდანაშაულო მაყურებელთანაა. პოლიტიკური ძალადობის ადგილი არ შეიძლება იყოს“.

ეგვიპტის პრეზიდენტი აბდელ ფატაჰ ელ-სისი: „შეშფოთებით ვადევნებდი თვალს  ინციდენტს, რომელიც მოხდა აშშ-ს ყოფილ პრეზიდენტსა და პრეზიდენტობის კანდიდატ დონალდ ტრამპთან. ვადასტურებ, რომ ეგვიპტე გმობს ინციდენტს, ვუსურვებ პრეზიდენტ ტრამპს სწრაფ გამოჯანმრთელებას და აშშ-ს საარჩევნო კამპანიის დასრულებას მშვიდ და ჯანსაღ ატმოსფეროში, ტერორიზმის, ძალადობისა და სიძულვილის ყოველგვარი გამოვლინების გარეშე.

გერმანიის კანცლერი ოლაფ შოლცი: „აშშ-ს პრეზიდენტობის კანდიდატზე დონალდ ტრამპზე თავდასხმა საზიზღარია. ვუსურვებ მას სწრაფ გამოჯანმრთელებას. ჩემი ფიქრები ასევე იმ ადამიანებთანაა, ვინც თავდასხმის შედეგად დაზარალდა. ასეთი ძალადობრივი აქტები საფრთხეს უქმნის დემოკრატიას“.

საფრანგეთის პრეზიდენტი ემანუელ მაკრონი: „ჩემი ფიქრები პრეზიდენტ დონალდ ტრამპთან არის, რომელიც მკვლელობის მცდელობის მსხვერპლია. ვუგზავნი მას ჩემს სურვილებს სწრაფად გამოჯანმრთელებისთვის. მაყურებელი დაიღუპა, რამდენიმე დაშავდა. ეს არის ტრაგედია ჩვენი დემოკრატიისთვის. საფრანგეთი იზიარებს ამერიკელი ხალხის შოკსა და აღშფოთებას“.

ევროკომისიის პრეზიდენტი ურსულა ფონ დერ ლაიენი: „ძალიან შოკირებული ვარ სროლით, რომელიც მოხდა ყოფილი პრეზიდენტის ტრამპის წინასაარჩევნო მიტინგის დროს. დონალდ ტრამპს ვუსურვებ სწრაფ გამოჯანმრთელებას და ვუსამძიმრებ უდანაშაულო მსხვერპლის ოჯახს. პოლიტიკურ ძალადობას ადგილი არ აქვს დემოკრატიაში“.

ჰოლანდიის პრემიერ მინისტრი დიკ შუფი: „შოკირებული ვარ ყოფილ პრეზიდენტსა და ამჟამინდელ პრეზიდენტობის კანდიდატ დონალდ ტრამპზე თავდასხმით. შვებაა, რომ მისი დაზიანებები უმნიშვნელოა. ვუსურვებ მას სრულ და სწრაფ გამოჯანმრთელებას და ვუსურვებ მას და მის ოჯახს საუკეთესო სურვილებს. პოლიტიკური ძალადობა სრულიად მიუღებელია“.

იტალიის პრემიერ მინისტრი ჯორჯია მელონი: „შეშფოთებით ვაკვირდები სიახლეებს პენსილვანიიდან. ჩემი სოლიდარობა და საუკეთესო სურვილები სწრაფ გამოჯანმრთელებისთვის მიემართება მას, იმ იმედით, რომ საარჩევნო კამპანიის მომდევნო რამდენიმე თვეში დიალოგი და პასუხისმგებლობა ჭარბობს სიძულვილსა და ძალადობას“.