სახალხო დამცველი საგანგებო განცხადებას ავრცელებს

362
წაკითხვა/ნახვა
IMG.GE

სახალხო დამცველი ეხმიანება “ქართული მარში”-ს მიერ დაანონსებულ საპროტესტო აქციას, რომელიც ქართველ გეი წყვილზე გადაღებული ფილმის პრემიერის დღეს, თბილისსა და ბათუმში, კინოთეატრებთან  უნდა გაიმართოს. სახალდო დამცველი მოუწოდებს შინაგან საქმეთა სამინისტროს, რომ უზრუნველყოს, როგორც  კინოსეანსზე დამსწრეთა, ასევე ლგბტ პირების უსაფრთხოება.

“საქართველოს სახალხო დამცველი შინაგან საქმეთა სამინისტროს მოუწოდებს გატარდეს პროაქტიული პრევენციული ღონისძიებები „ქართული მარშის“ მიერ კინოფილმის „და ჩვენ ვიცეკვეთ“ ჩვენებისას თბილისისა და ბათუმის კინოთეატრების შესასვლელების ბლოკირების დაანონსებასთან დაკავშირებით. მნიშვნელოვანია, სამართალდამცავმა უწყებამ უზრუნველყოს როგორც ლგბტ+ თემის წარმომადგენელთა ასევე კინოჩვენებაზე დამსწრე ყველა პირის უსაფრთხოება.

პრევენციული ღონისძიებების გატარების მოთხოვნით სახალხო დამცველმა შინაგან საქმეთა მინისტრს ოფიციალური წერილით 2019 წლის 5 ნოემბერს მიმართა.

სახალხო დამცველი განმარტავს, რომ შეკრებისა და მანიფესტაციის უფლებით დაცულია მხოლოდ მშვიდობიანი შეკრების შესაძლებლობა და არა იმგვარი ქმედებები, რომლებიც მიზნად ისახავს სხვათა უფლებებისა და თავისუფლებების შეზღუდვას. აღნიშნული მიზნით, შეკრებებისა და მანიფესტაციების შესახებ საქართველოს კანონი აქციის ორგანიზატორებს და მონაწილეებს გარკვეულ ვალდებულებებს აკისრებს, მათ შორის დაუშვებელია შეკრებისა და მანიფესტაციის ჩატარებისას შენობების შესასვლელების ბლოკირება.

შესაბამისად, სახალხო დამცველი მოუწოდებს აქციის ორგანიზატორებსა და მონაწილეებს, თავი შეიკავონ შეკრების ორგანიზებისა და ჩატარების კანონმდებლობით დადგენილი წესების დარღვევისგან, მათ შორის არ მოახდინონ კინოთეატრების შესასვლელების ბლოკირება. აღნიშნული ვალდებულებების დარღვევისთვის, დარღვევის სიმძიმიდან გამომდინარე, საქართველოს კანონმდებლობით გათვალისწინებულია როგორც ადმინისტრაციული, ისე სისხლისსამართლებრივი პასუხისმგებლობა.”– აღნიშნულია სახალხო დამცველის განცხადებაში.

თქვენი კომენტარი?