“პატრიოტთა ალიანსი” მორიგ აქციას სპორტის სასახლეში გამართავს

“პატრიოტთა ალიანსი” მორიგ აქციას 30 ნოემბერს,  სპორტის სასახლეში გამართავს. ამის შესახებ პარტიის გენერალურმა მდივანმა, ირმა ინაშვილმა განაცხადა.

“30 ნოემბერს, შაბათს, საღამოს 6 საათზე ჩვენ ვიკრიბებით თბილისში, სპორტის სასახლეში!” რა ტიპის პოლიტიკურ პროცესთან გვაქვს საქმე.
რომის იმპერია ხშირად იყენებდა მართვის შემდეგ სქემას.

პირველი – ხელისუფლება ოპონენტად მუდმივად ინარჩუნებს ყველასათვის ცნობილ, ბოროტ ძალას, ჩვენს შემთხვევაში ასეთია სააკაშვილი და ბოკერია, განზრახ არ სჯის მას და მუდმივად აცოცხლებს ამ ძალას პოლიტიკურ სივრცეში.

მეორე- ყოველთვის, როცა ხელისუფლება ატყუებს ხალხს და სჩადის ცუდ საქმეს, რასაც წესიერი, რიგითი ადამიანების აღშფოთება მოსდევს, ხელისუფლება უმალ ამხედრებს ბოროტ ძალას, ჩვენს შემთხვევაში- სააკაშვილსა და ბოკერიას.

მესამე- ხელისუფლება ყველანაირ საშუალებას აძლევს ბოროტებს დაანთონ კოცონები და შექმნან რევოლუციის ილუზია, რომლის მოწყობაც სინამდვილეში მათ არ ძალუძთ!

მეოთხე- ამ ყველაფრის შემყურე წესიერ ხალხს ავიწყდება, რომ ხელისუფლებამ ისინი მორიგჯერ მოატყუა, ცუდი საქმე ჩაიდინა, ხალხი ამაზე აღარ ფიქრობს და ვერც ფიქრობს. ხალხი ფიქრობს უკვე მხოლოდ იმაზე, რომ ბოროტებმა რევოლუცია არ მოაწყონ.

მეხუთე – ამის შემდეგ, ხელისუფლება ჰუმანურად შლის ბოროტებს, ათავისუფლების (ჩვენს შემთხვევაში) რუსთაველის პროსპექტს და ხალხს უხარია, რომ სააკაშვილ-ბოკერიების რევოლუცია თავიდან ავიცილეთ და ყველას ავიწყდება ის ტყუილი და ცუდი საქმე, რაც მანამდე ხელისუფლებამ ჩაიდინა. მაგალითად, როგორ მოგვატყუა არჩევნების თემაზე!

ხელისუფლებაზე გაბრაზებული ხალხი ხდება ხელისუფლების დამცველი. აი, ამ რეჟიმში ვართ 7 წლის მანძილზე. თითქოს ერთმანეთს ებრძვიან და ამ დროს ერთმანეთისთვის სასიცოცხლოდ მნიშვნელოვანნი არიან.
ჩვენ ვამბობთ: მიმდინარე საპროტესტო აქციების პროცესში ჩვენ ვმოქმედებთ მარტო და დამოუკიდბელად. არანაირ შეთანხმებას ბოროტებთან არ ვაპირებთ. სამართლიანობა ბოროტებთან შეთანხმებით ვერ მიიღწევა.

ვპირდებით საზოგადოებას: ჩვენი გამარჯვების შემთხვევაში, დროის უმოკლეს ვადებში, ჩვენ მყისიერად შევცვლით საარჩევნო სისტემას. არჩევნები ბოლოს და ბოლოს გახდება სამართლიანი და თავისუფალი! როგორ ვიმოქმედებთ ჩვენ! როგორც უკვე გითხარით, ჩვენ საპროტესტო აქციების რეჟიმზე გადავედით. ჩვენ გადავედით საპარლამენტო საქმიანობის ბოიკოტირების რეჟიმზე. პროტესტი არ შეწყდება.

30 ნოემბერს, შაბათს, საღამოს 6 საათზე ჩვენ ვიკრიბებით თბილისში, სპორტის სასახლეში. ჩვენ მოვითხოვთ ბოლოს და ბოლოს დაისაჯონ დამნაშავეები! დამთავრდეს პოლიტიკური სპექტაკლები. მითუმეტეს, წინა რეჟიმის მთავარ ფიგურანტებთან მიმართებაში არსებობს მთავარი პროკურორის ყოფილის მოადგილის საჯარო განცხადება, რომელიც მან ტელეკომპანია „იმედის“ ეთერში გააკეთა.

მოვითხოვთ: შეასრულოს „ქართულმა ოცნებამ“ დაპირება და ჩავატაროთ სამართლიანი და თავისუფალი არჩევნები. გვახსოვდეს, რომ „ქართული ოცნება“ ამ სპექტაკლში მონაწილეობს, რათა 2020 წლის პარლამენტში მეორე ძალად კვლავ შეიყვანოს ნულოვანი რეიტინგის მქონე სააკაშვილი და ბოკერია.” – განაცხადა ირმა ინაშვილმა.