ბრიტანეთის პრემიერ-მინისტრმა კირ სტარმერმა გამოაცხადა ისტორიაში პირველი ქალი საიდუმლო დაზვერვის სამსახურის (MI6) ხელმძღვანელად დანიშვნის შესახებ.
ინფორმაციას გამოცემა “Bloomberg” ავრცელებს .
განცხადების თანახმად, 47 წლის ბლეიზ მეტრეველი MI6-ის ახალი ხელმძღვანელი გახდება და ამ თანამდებობაზე შემოდგომაზე რიჩარდ მურს შეცვლის. ამჟამად ის ამ სადაზვერვო სამსახურში ტექნოლოგიებისა და ინოვაციების გენერალური დირექტორია.
„გაერთიანებული სამეფო უპრეცედენტო მასშტაბის საფრთხეების წინაშე დგას – იქნება ეს აგრესორები, რომლებიც ჩვენს წყლებში თავიანთ სადაზვერვო გემებს აგზავნიან, თუ ჰაკერები, რომელთა დახვეწილი კიბერშეთქმულებები ჩვენი საჯარო სერვისების ჩაშლას ისახავს მიზნად“, – განაცხადა ბრიტანეთის მთავრობის მეთაურმა.
მეტრეველი MI6-ის მე-18 ხელმძღვანელი და ამ თანამდებობაზე პირველი ქალი იქნება, რომელსაც, როგორც წესი, ასო „C“-ით მოიხსენიებენ და არა კოდური სახელით „M“, რომელსაც ჯუდი დენჩი იყენებდა ჯეიმს ბონდის ფილმებში იან ფლემინგის მიერ შექმნილი გამოგონილი MI6-ის უფროსის განსახიერებისას.
Multimedia.ge-ს დამფუძნებელი და მთავარი რედაქტორი.
ინტერნეტ რესურსი 2018 წლიდან ფუნქციონირებს