ლაპლანდიელი სანტა-კლაუსი ენგურის ხიდზე იმყოფებოდა

708
წაკითხვა/ნახვა

ლაპლანდიელი სანტა, რომელიც მსოფლიოს მშვიდობის კეთილი ნების ელჩია დღეს საოკუპაციო ხაზთან, ენგურის ხიდზე იმყოფებოდა, სადაც ოკუპაცია დაგმო, საქართველოს ერთიანობასა და მშვიდობაზე ისაუბრა.

,,ჩვენ ვიმყოფებით ძალიან განსაკუთრებულ ადგილას, დღეს ეს ხიდი ჯერ კიდევ ყოფს ოკუპირებულ აფხაზეთს და თავისუფალ საქართველოს, მსოფლიოში ჩემი მთავარი დანიშნულება არის ვიყო ელჩი მშვიდობის და სიკეთის! მე ვიცი, რომ ახლო მომავალში ეს საზღვარი არ იარსებებს და ვისურვებ, რომ მოვიდე შემდეგ წელს ამ ხიდთან და აღვნიშნოთ ამ საზღვრის არქონა, ეს სურვილი საუკეთესო იქნება ქართველებისთვის და მსოფლიოსთვის. ახლა დროა ქართველი ხალხის და თავისუფალი საქართველოსი, მიყვარხართ გისურვებთ წარმატებებს!“ – განაცხადა მსოფლიოს მშვიდობის კეთილი ნების ელჩმა ენგურის ხიდზე.

ლაპლანდიელმა სტუმარმა ახალი წელი საოკუპაციო ხაზთან მდებარე სოფელ რუხში მცხოვრებ ბავშვებსაც მიულოცა, მოგვიანებით კი საჩუქრები ზუგდიდში, ბარამიას ქუჩაზე, დევნილ ბავშვებს დაურიგა. ადგილზე იმყოფებოდნენ სამეგრელო-ზემო სვანეთის სახელმწიფო რწმუნებულის მოადგილე დავით ვერავა, ზუგდიდის მერის მოადგილე კონსტანტინე კაკავა და ადგილობრივი ხელისუფლების სხვა წარმომადგენლები.

სანტა-კლაუსი ზუგდიდის შემდეგ ფოთს სტუმრობდა, სადაც ათასობით ადამიანი დახვდა ქალაქის მთავარ მოედანზე,მთავარ ნაძვის ხესთან, მისალოც ბარათებთან და საჩუქრებთან ერთად სამახსოვრო ფოტოები გადაიღო, შემდეგ კი სხვადასხვა ღონისძიებაში მიიღო მონაწილეობა, რომლის დასრულლების შემდეგ ის უკვე  მესტიაში გაემგზავრა.

ლაპლანდიელი სტუმარი საქართველოში 9 იანვრამდე დარჩება.

თქვენი კომენტარი?