ეს უცხოს არ გაუკეთებია… ჩვენებმა, ქართველებმა, ძირითადად ერთ ადამიანზე გაბრაზებულმა ქვეყნის მესვეურებმა გააკეთეს..

526
წაკითხვა/ნახვა
IMG.GE

პეტრე კვარაცხელია (კოლხი)


“ყველას ახსოვს 90-იანი წლების უბედური დღეები… კიდევ უფრო უბედური ღამეები და საერთოდ, ჩაბნელებული პერიოდი. ცეცხლწაკიდებული სახლები, უპატრონო მიცვალებულები, დაკარგული ადამიანები, ქუჩებში დახოცილი ცხოველები… კვამლში გახვეული სკოლა-შენობა-ნაგებობები.

ეს უცხოს, შორიდან მოსულს არ გაუკეთებია… ჩვენებმა, ქართველებმა, ძირითადად ერთ ადამიანზე გაბრაზებულმა ქვეყნის მესვეურებმა გააკეთეს… მერვე-მეცხრე კლასელ გოგონებს აუპატიურებდნენ, უდანაშაულო მოსახლეობის წამებით, დაუთოებით, დასახიჩრებით ,,კაიფობდნენ”… რაც არ უნდა დრო გავიდეს, ამას ვერ წაშლი, მეტი ბრაზი გიპყრობს, ნერვები გაწყდება უსამართლობის, ფარისევლობის, მლიქვნელობის გამო…

ეს არ იყო აფხაზეთში, სამაჩაბლოში, სამეგრელოში იყო… ტანკებით შელეწილი კარ-მიდამოები, ულუკმაპუროდ დარჩენილი ჩვილები… შეუჩერებლად ტყვიების ზუზუნი… ბრმად გასროლილ იარაღს შეწირული უამრავი ახალგაზრდობა… ეს ამბავია ჩაკირული ჩვენი თაობის ბავშვობის ფსკერზე… ეს გადაშლილი წიგნია… წაკითხვაც არ უნდოდა, ვფურცლავდით, ვათვალიერებდით… ჩვენ წინ ვხედავდით.

ჩვენ ქუჩაზე შემოსულმა ბეტეერმა ადრიანად შეაფხიზლა სამეზობლო… დედამ წამოგვყარა ბავშვები, გავიქცეთ, მოდიანო… გავრბოდით, ვიმალებოდით… მაშინ ვერ ვხვდებოდი, სად უნდა გავქცეულიყავით, ან ვისგან დაგვეცვა თავი… მერე რომ გავაცნობიერე, შემრცხვა, მეტკინა, დავმძიმდი და დღემდე ასეა… სულ ასე იქნება… რა მნიშვნელობა აქვს, ვის სად დაასვენებ, სად დაკრძალავ, საქმეები რჩება… საქმე კი, ყველა სიტყვაზე მჭრელია… სულ არ ვიცით, სად არის დაკრძალული რუსთაველი, მაგრამ არაფერი დაკლებია მის სახელს!.. ჰოდა, ვწუხვარ, ჰოდა, სულ გამახსენდება… უფრო სწორად, გამახსენებენ… რამდენჯერ?! იმდენჯერ, რამდენჯერაც შეეხებიან!”

თქვენი კომენტარი?
IMG.GE