ბადრი ესებუას ფოტოებზე შსს მტკიცებულებებს ავრცელებს

308
წაკითხვა/ნახვა
IMG.GE

შინაგან საქმეთა სამინისტრო ეხმიანება “მთავარი არხი”-ს მიერ გავრცელებულ ფოტომასალას, რომელზეც ნათქვამია, რომ გადაღებულია მიმდინარე წლის 27 ოქტომბერს, ხოლო მძევლების საქმეზე ძებნილი ბადრი ესებუა თავისუფლად გადაადგილდება, თუმცა აღმოჩნდა, რომ ფოტოები გადაღებულია 2020 წლის 6 ოქტომბერს, დანაშაულის ჩადენამდე 15 დღით ადრე.

“გვსურს, საზოგადოებას მივაწოდოთ მართებული ინფორმაცია მედიასაშუალებებში გავრცელებულ, ბადრი ესებუას გადაადგილების ამსახველ ფოტო და ვიდეომასალასთან დაკავშირებით.

21 ოქტომბერს, ზუგდიდში, “საქართველოს ბანკის” ფილიალზე მომხდარ თავდასხმაში პოლიციის მიერ იდენტიფიცირებული პირის – ბადრი ესებუას გადაადგილების შესახებ რამდენიმე ტელევიზიის მიერ საზოგადოებისთვის მიზანმიმართულად მიწოდებულ იქნა არასწორი ინფორმაცია.

ფოტო და ვიდეომასალა სხვადასხვა ობიექტზე განთავსებული ვიდეომონიტორინგის მოწყობილობების მიერ გადაღებულია მიმდინარე წლის 6 ოქტომბერს და არა 27 ოქტომბერს, ასევე, გასაჯაროებული მასალა გადაღებულია სამეგრელოს რეგიონის სხვა მუნიციპალიტეტში და არა ზუგდიდში, როგორც ეს მედიასაშუალებებმა გაავრცელეს.

თავდასხმაში იდენტიფიცირებული პირის – ბადრი ესებუას ზუგდიდის ქუჩებში თითქოს თავისუფლად გადაადგილება და ამ ინფორმაციის მიზანმიმართული გაყალბება ემსახურება საზოგადოების სიცრუეში შეყვანას და სამართალდამცველი უწყებების დისკრედიტაციას.

პოლიცია, 1988 წელს დაბადებული ბადრი ესებუას ადგილსამყოფელის დადგენისა და დაკავების მიზნით, სპეციალურ ოპერატიულ, საგამოძიებო და სამძებრო მოქმედებებს აქტიურ რეჟიმში განაგრძობს.”– ნათქვამია შსს-ს განცხადებაში.

თქვენი კომენტარი?
IMG.GE