განათლების დარგის ექსპერტებთან ბოდიშის მოხდით, ორიოდე დილეტანტური კითხვა და აზრი მინდა გამოვთქვა

348
წაკითხვა/ნახვა
IMG.GE

დავით უსუფაშვილი – შენების მოძრაობა

განათლების დარგის ხელმძღვანელებთან და ექსპერტებთან ბოდიშის მოხდით ორიოდე დილეტანტური კითხვა და აზრი მინდა გამოვთქვა დაანონსებული რეფორმის ერთ კონკრეტულ მიმართულებაზე:

1. კარსმომდგარი სასკოლო გამოცდების გაუქმებით 80 000-ზე მეტი უფროსკლასელი მოქალაქის განათლების დონეს მეტს ვარგებთ თუ მეტს ვავნებთ? მგონი მხოლოდ ვავნებთ და ვერაფერს ვარგებთ. ფაქტია, რომ სკოლაში სწავლის დარჩენილ პერიოდში მე-11-12 კლასების მოსწავლეების მიერ ცოდნის გაღრმავებისთვის ახალს და უფრო ეფექტიანს ვერაფერს ვნერგავთ. ამასობაში, გამოცდების გაუქმებით ვაუქმებთ იმ ერთადერთ მოტივატორსაც, რაც მოსწავლეების უდიდეს უმრავლესობას ამ ბოლო თვეებში მაინც ახედებს წიგნში და მე-12 თუ არა მე-8 კლასის შესატყვისი ცოდნა მაინც გაყვებათ ხოლმე ცხოვრების გზაზე. მთავარია „სტრესისგან“ ვიხსნათ ამდენი სწავლისგან განაწამები ბავშვები და, არა უშავს, 2-3 ეროვნულსაგამოცდოს გარდა სხვა საგნებში ჩარჩნენ მე-5 კლასის დონეზე?…

2. სკოლაში მოსწავლეებისთვის 11-12 წლის განმავლობაში სათანადო განათლების მიცემას ხელს ის უშლის, რომ მე-11 და მე-12 წელს მათი გამოცდაა დაგეგმილი? რბილად რომ ვთქვა, მთლად ასე არ უნდა იყოს საქმე… ამიტომ, თუ ახალ სისტემას გამოცდები აღარ სჭირდება, სკოლის რეფორმა ამ გამოცდების გაუქმებით კი არ უნდა დაიწყოს, არამედ ამით უნდა დასრულდეს.

3. კარტოფილის უკეთესი მოსავლის მოსაყვანად ხომ არ ვატარებთ ექსპერიმენტებს, რომელსაც შეიძლება ერთი წლის მოსავალი შევწიროთ?… ყოველი დამამთავრებელი კლასის მოსწავლეები ერის ერთი წლის „მოსავალია“ და ხელისუფლებების უთავბოლო განათლების პოლიტიკას მათ მორიგ ჯერზე ვერ შევწირავთ.

წარმოუდგენელია, მაგრამ დღეს იმაზეა მსჯელობა, რომ რადგან სიტყვა გაგვექცა და ერის 2002 წლის „მოსავალ“ 40 000 მე-11 კლასელს ხელიდან წიგნებს ვაგდებინებთ, მაშინ ერის 2001 წლის „მოსავალ“ 41 000 მე-12 კლასელსაც იგივე გავაკეთებინოთ და თან ეს ყველაფერი საზეიმო მიღწევად აღვაქმევინოთ… სწორი ის იქნება, ამ 80 000-ზე მეტ ახალგაზრდას ბოდიში მოვუხადოთ, დღემდე 10 წელი რომ სკოლაში სათანადოდ ვერ ვასწავლეთ, და სწორედ რომ დარჩენილი გამოცდებისთვის უკეთ მომზადება ვთხოვოთ და მოვუწოდოთ. სკოლის რეფორმა კი, გამოცდიანი თუ უგამოცდო, ერის 2003 და შემდგომი წლების „მოსავალს“ შევაშველოთ და შევარგოთ.

თქვენი კომენტარი?
IMG.GE