ბოლო ამბები
ივნისი 17, 2024

უნგრეთი მხარს უჭერს საქართველოს როგორც კანდიდატის სტატუსის მიღების თვალსაზრისით, ასევე ზოგადად ევროინტეგრაციის გზაზე – ირაკლი კობახიძე

დეკ8,2023
გაზიარება

„უნგრეთი მხარს უჭერს საქართველოს როგორც კანდიდატის სტატუსის მიღების თვალსაზრისით, ასევე ზოგადად ევროინტეგრაციის გზაზე“- ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებთან განაცხადა.

„დასრულდა ვიზიტი უნგრეთში, რომელიც შედგა უნგრეთის ვიცე-პრემიერის მოწვევის საფუძველზე. შევხვდით თავად ვიცე-პრემიერს. ასევე, შევხვდით პარლამენტში შესაბამის თანამდებობის პირებს, პარლამენტის თავმჯდომარის მოადგილეს, ევროპული საქმეთა კომიტეტის ხელმძღვანელს. ასევე, აღმასრულებელი ხელისუფლების წარმომადგენლებთან გვქონდა შეხვედრები.

იყო ძალიან საინტერესო დისკუსიები ყველა თემაზე, რომელიც უკავშირდებოდა ორმხრივ თანამშრომლობას, ასევე საქართველოს ინტეგრაციას ევროპულ სტრუქტურებში და კიდევ ერთხელ დაფიქსირდა ძალიან მყარი მხარდაჭერა ჩვენი უნგრელი კოლეგების მხრიდან“-აღნიშნა კობახიძემ.

კითხვაზე, უნგრეთშიც ასე ფიქრობენ თუ არა, რომ ერთი წლის წინ საქართველოს დამსახურებულად არ მოექცნენ კანდიდატის სტატუსთან დაკავშირებით, კობახიძემ აღნიშნა, რომ უნგრეთის ხელისუფლების პოზიცია ამ საკითხთან დაკავშირებით ნათელია.

„უნგრეთის ხელისუფლების პოზიცია კანდიდატის საკითხთან დაკავშირებით არის ძალიან ნათელი. ამაზე თავად პრემიერმა, ბატონმა ორბანმაც ისაუბრა. მან აღნიშნა, რომ გაკვირვებული იყო ყველა, როდესაც შარშან საქართველოს არ მიენიჭა კანდიდატის სტატუსი. რა თქმა უნდა, ობიექტურად საქართველო იმსახურებდა კანდიდატის სტატუსის მიღებას შარშანაც და იმსახურებს წელსაც.

როდესაც ადამიანი ობიექტური კრიტერიუმების მიხედვით აფასებს არსებულ ვითარებას, ბუნებრივია უალტერნატივოა ის, რომ ქვეყანას ეკუთვნოდა და ეკუთვნის კანდიდატის სტატუსი. შესაბამისად, ჩვენ გვაქვს იმედი, რომ მომავალ კვირაში საბოლოოდ იქნება მიღებული დადებითი გადაწყვეტილება საქართველოს სასარგებლოდ“– განაცხადა ირაკლი კობახიძემ.

სხვა ამბების წაკითხვა