ნაციონალური მოძრაობის თბილისის ორგანიზაცია 300-მდე ადამიანმა დატოვა. ამის შესახებ დღეს გამართულ ბფირინგზე პარტიის უკვე ყოფილმა წევრებმა, ბესო გაზდელიანმა და დავით ლაგვილავამ განაცხადეს,
მათი ცნობით, ისინი რჩებიან მიხეილ სააკაშვილის მხარდამჭერად, თუმცა ლევან ხაბეიშვილთან თანამშრომლობს არ აპირებენ.
„აქ ვდგავართ „ნაციონალური მოძრაობის“ თბილისის რაიონული ორგანიზაციების წარმომადგენლები, მათი უმრავლესობა. ეს ის ადამიანები არიან, რომლებიც წლების განმავლობაში უანგაროდ და ერთგულად ემსახურებოდნენ პარტიას და იმ ღირებულებებს, იდეალებს, რის გამოც ჩვენ თავის დროზე პარტიაში მოვედით. აქ არიან ადამიანები, ვისი მხრებითაც მოვიდა პარტია აქამდე.
მოგმართავთ ახალ მენეჯმენტს – რა არის თქვენთვის ეს პარტია? შეიძლება ეს არის მექანიზმი პარლამენტში მოხვედრის, ამბიციების დაკმაყოფილების, მაგრამ ჩვენთვის ეს არის პოლიტიკური ოჯახი, სადაც მოვედით ღირებულებებით და იდეალებით დამუხტულები. მაგრამ, სამწუხაროდ, დღეს ჩვენს თავს მანდ ვეღარ ვხედავთ. გვიწევს ძალიან მძიმე გადაწყვეტილების მიღება – ვტოვებთ „ერთიან ნაციონალურ მოძრაობას“, ვდგამთ ნაბიჯს წინ, მომავალში იმისთვის, რომ ვიბრძოლოთ ჩვენი ქვეყნის უკეთესი მომავლისთვის. ბატონო მიშა, მინდა, გისურვოთ ჯანმრთელობა და მალე თავისუფლება, ჩვენ ვრჩებით „ვარდების რევოლუციის“ იდეების ერთგულნი და მიხეილ სააკაშვილის პოლიტიკური თანამებრძოლები“, – განაცხადა ბესო გაზდელიანმა, რომელიც მის თანამოაზრებთან ერთად ნიკა მელიას გუნდს შეუერთდა.
„ის, რაც დღეს ხდება პარტიაში – კლანურობა, კარჩაკეტილობა, არაფორმალური მმართველობა, განსხვავებული აზრის მქონე, კრიტიკულად მოაზროვნე ადამიანების დევნა პარტიიდან, ამის გამო მივიღეთ გადაწყვეტილება, დავტოვოთ „ერთიანი ნაციონალური მოძრაობა“, რადგან მიგვაჩნია, რომ დღეს „ნაციონალური მოძრაობა“ აღარ არის ეფექტური იარაღი დღევანდელი რუსული რეჟიმის დასამარცხებლად.
აუცილებლად ვაპირებთ შესვლას ახალ პარტიაში, რომელიც დაფუძნდება უახლოეს მომავალში ნიკა მელიას ხელმძღვანელობით და სწორედ ამ პარტიიდან ვაპირებთ ღირსებით, სიმართლით, შეუპოვრობით ბრძოლის გაგრძელებას“, – აღნიშნა დავით ლაგვილავამ, რომელიც ასევე ნიკა მელიას მხარდამჭერია.
გიორგი ლაღიძე არის Multimedia.ge-ს დამფუძნებელი და მთავარი რედაქტორი.
ინტერნეტ რესურსი 2018 წლიდან ფუნქციონირებს