არც ერთ ექიმს, ექთანსა და სანიტარს დასაქმების ან ანაზღაურების პრობლემა არ შეექმნება – ჯანდაცვის მინისტრი რესპუბლიკურ საავადმყოფოზე

364
ნახვა/წაკითხვა

„რესპუბლიკური საავადმყოფოს მედპერსონალთან დაკავშირებით, მინდა, დაგიდასტუროთ, ის რაც პრემიერმა განაცხადა და მეც არაერთ ეთერში მითქვამს, არც ერთი მათგანი არ დარჩება სამსახურის გარეშე. არც ერთ ექიმს, ექთანსა და სანიტარს დასაქმების ან ანაზღაურების პრობლემა არ შეექმნება. გარდა ამისა, მინდა, ხაზგასმით აღვნიშნო, რომ ტერიტორიის, კომერციული მიზნებისთვის, გაყიდვა არ იგეგმება და ახალი კლინიკა ზუსტად იმავე ადგილზე აშენდება, სადაც ახლა რესპუბლიკური საავადმყოფო მდებარეობს“, – განაცხადა  ჯანმრთელობისა და სოციალური დაცვის მინისტრმა ზურაბ აზარაშვილმა.

რაც შეეხება რესპუბლიკურ საავადმყოფოში გამოცხადებულ რეორგანიზაციას, ზურაბ აზარაშვილის განმარტებით, ბრძანება არ ეხება სამედიცინო პერსონალს.

„რეორგანიზაცია ავტომატურ რეჟიმში არ ნიშნავს სამსახურიდან ადამიანების გათავისუფლებას. ბრძანება არ ეხება სამედიცინო პერსონალს, ეს ეხება ადმინისტრაციას, კარგი იქნება, თუ ამ ორს ერთმანეთისგან გავარჩევთ. რაც შეეხება სამედიცინო პერსონალს, არანაირი პრობლემა დასაქმების და ანაზღაურების კუთხით, მათ არ შეექმნებათ“, – განაცხადა აზარაშვილმა“, – განაცხადა ზურაბ აზარაშვილმა.

ამასთან, როგორც ჯანდაცვის მინისტრმა აღნიშნა, ახალი რესპუბლიკური საავადმყოფოს შესახებ დეტალურ ინფორმაციას, უწყება, მომდევნო კვირაში წარადგენს.

„ჩვენი ქვეყნისა და მოქალაქეებისთვის ძალიან კარგ საქმეს ვაკეთებთ. მომდევნო კვირაში, გვექნება  პრეზენტაცია და კლინიკის თანამშრომლებსა და საზოგადოებას, დეტალურ ინფორმაციას მივაწოდებთ, რას ვაპირებთ რესპუბლიკურ საავადმყოფოსთან დაკავშირებით“. – განაცხადა მინისტრმა.