ბოლო ამბები
მაისი 27, 2024

მეც გაგაცნობთ ჩემს პოზიციას “კეზერაშვილის საქმეზე” იმიტომ, რომ, ჩემი აზრით, ბევრისგან განსხვავებული აზრი მაქვს – ირაკლი ტაბლიაშვილი

აპრ14,2023
გაზიარება

ტელეკომპანია “ფორმულის” ჟურნალისტისა და გადაცემა “კონტექტი”-ს წამყვან ირაკლი ტაბლიაშვილის პოზიცია BBC-ის საგამოძიებო ფილმზე ე.ქ ქოლ-ცენტრებთან და დავით კეზერაშვილის შესაძლო კავშირებთან დაკავშირებით:

“მეც გაგაცნობთ ჩემს პოზიციას “კეზერაშვილის საქმეზე”… გაგაცნობთ იმიტომ, რომ, ჩემი აზრით, ბევრისგან განსხვავებული აზრი მაქვს.

დავიწყოთ იმით, რომ BBC – ის მასალა პროფესიონალიზმის პიკია და ბრიყვია ის, ვინც ფიქრობს, რომ ბრიტანული მედია შეკვეთებს იღებს და აი, ბიძინაა ამ კამპანიის თუ მასალის უკან! არა! ბიძინა შვეიცარულ გაზეთშიც ვერ ბეჭდავს მისთვის სასურველ მასალას! BBC მისთვის საერთოდ მიუწვდომელია!.. მაგრამ… მაგრამის შემდეგ კი ეს უნდა ვთქვათ – ვინ მიიყვანა BBС და მისი ჯგუფი ამ თემამდე კი არა, ამ რაკურსამდე! ამ პერსონებამდე… ეს ცალკე თემაა!

ამავე დროს, ამ მასალამ სწორედაც რომ “სულზე მიუსწრო” კონკრეტულად ივანიშვილს! ის და მისი ხელისუფლება ყველაფერს გააკეთებენ… და აქ ვიტყვი მნიშვნელოვანს – არა იმდენად კეზერაშვილის, რამდენადაც კეზერაშვილის თანამფლობელობით არსებული არხის – “ფორმულას” რეპუტაციის შესალახად და დასაძირად! რასაც იოლად მოახერხებენ, თუ ბ-ნ კეზერაშვილს აღარ მოუნდება ან გადაუნდება არხის დაფინანსება!

ამ მხრივ თუ ვიმსჯელებთ, მე არ ვიზიარებ ლაშა ბუღაძის აზრს, რომლის თანახმადაც, კეზერაშვილმა აქტივები უნდა გადასცეს თანამშრომლებს! ეს ნამდვილად კეთილშობილური მოსაზრება, ჩემი აზრით, პრაგმატიზმისგან დაცლილია!

თუ აქტივებს სხვებს გადასცემს, რაღატომ დააფინანსებს? თუ აღარ/ვეღარ დააფინანსებს, “ფორმულა” დასუსტდება და მოკვდება! თუ “ფორმულა” მოკვდება, გაძლიერდება ისედაც ძლიერი რუსულ-სახელისუფლო პროპაგანდა! “ფორმულა” ხომ ერთ-ერთი ლიდერია სწორედ რუსეთთან და მის ადგილობრივ საცეცებთან ბრძოლის პროცესში!

მეორე მხრივ, ბუნებრივია, უზარმაზარი მნიშვნელობა აქვს თანა – მფლობელის რეპუტაციას! ასევე ბუნებრივია, რომ ბევრს (და მათ შორის მეც) არ მოუნდება იმ ტელევიზიაში მუშაობა (რაც არ უნდა სწორი და მართებული სარედაქციო პოლიტიკა ჰქონდეს მას), რომლის თანამფლობელიც ძარცვავს გერმანელ თუ შვედ პენსიონერებს!.. რაც არ უნდა არ ერეოდეს ის სარედაქციო პოლიტიკაში (და არ ერევა), კომპრომისს მიღმა იქნება დარჩენა არხზე, რომლის დონორ-სპონსორიც საერთაშორისო კრიმინალშია მხილებული… და აქ კიდევ ერთ მთავარ სიტყვას ვიტყვი!.. 

მხილებული და ბრალ-და-დებული სამართლებრივი თვალსაზრისით!
დიახ, ზე-კლასის BBC-ის მასალა დიდად ვნებს უშულოდ კეზერაშვილის რეალურად მხოლოდ რეპუტაციას და გვარტყამს ჩვენც – თანამშრომლებს, რომლებიც, ბუნებრივია, ვერ ვაგებთ პასუხს კეზერაშვილზე, მაგრამ, მისი ფინანსებით კი ვსარგებლობთ-ვოპერირებთ! თუმცა, ბრიტანული მაუწყებლის უდავოდ ძლიერი და საინტერესო მასალა ჯერაც! ვიმეორებ – ჯერაც! არაა სამართლებრივი გამოძიების და მით უფრო გამამტყუნებელი ვერდიქტის გამოტანის საფუძველი! ეს ბრიტანული! (და არა ქართული) სამართალწარმოების (და რა მედიის) და სასამართლოს პრეროგატივაა! და მტკიცების ტვირთი ბრალდებაზეა! და დამნაშავედ სცნობენ კეზერაშვილს? დამთავრდება კეზერაშვილიც და “ფორმულაც”… გამართლდება კეზერაშვილი?.. ძალიანაც კარგი მოხდება ჩვენთვისაც.

აქვე უნდა ვთქვა, რომ პირადად ჩემთვის კიდევ ერთი, ორი, სამი ფაქტორია მნიშვნელოვანი! მაგალითად, ვთქვათ მამაცაშვილის ფაქტორი! კეზერაშვილის დასჯით! განდევნით! მისთვის დანაშაულის დამტკიცებით (დამტკიცების შემთხვევაში) აღმოიფხვრება კი “გერმანელი პენსიონერების” ძარცვის პრეცენდენტები? თუ “ბაზარზე” დარჩება მხოლოდ მამაცაშვილი და ფარცხალაძე? ოღონდ, თან ისე, რომ “ფორმულაც” აღარ იარსებებს?

პასუხი ნათელია – მამაცაშვილი დარჩება და მხოლოდ! და ის, რომ BBC-ის მასალა მასზე არ გაუკეთებია, არ ნიშნავს, რომ მასზე არსებული ინფორმაცია აუცილებლად უსაფუძვლოა!

კეთილი! ამასაც დავანებოთ თავი!.. და ვისაუბროთ ინდულგენციაზე!.
ბევრჯერ მითქვამს და გავიმეორებ – “ფორმულა”, ჩემი აზრით, საუკეთესო არხია! მაგრამ, თუ კეზერაშვილს სამართლებივად და თან ბრიტანეთში დაუმტკიცდება ის, რომ სქემებით ძარცვავს გერმანელ პენსიონერებს! მაშინ, საუკეთესო არხის დაფუძნება-სპონსორობა ვერ იქნება მისი ინდულგენციის საფუძველი!.. გაგიკვირდებათ და ვერც ანტირუსული საინფორმაციო პოლიტიკა იქნება მისი ინდულგენციის საფუძველი! და ვერც ის, რომ თავად მას აქვს დასავლური მსოფლხედვა!

აქვე ვიტყვი, რომ, ჩემი ანალიზით, ვერც ვერაფერი დაუმტკიცდება! და BBC – ის მასალაშიც არაა მტკიცებათა კორიანტელი! არამედ არის აბზაცები დაშვებათა შესახებ.
მეხუთე მხრივ, წარმოიდგინეთ, რომ ეს ყველაფერი მართლა ასე მოხდა!!! ანუ ბრიტანულმა სამართალდამცავებმა და სასამართლომ დაამტკიცეს კეზერაშვილის ბრალეულობა! რა მოხდება შემდეგ? რა და… დაიხურება “ფორმულა”, ხოლო თუ “ფორმულა” ან დასუსტდა! ან დაიხურა! ან მისმა სპონსორმა აღარ განაგრძო მისი დაფინანსება! ან… მიზეზთა გამო მანამდე დაიწყო დეზინტეგრაციული პროცესები…

შემდეგ რა ხდება … რა მოხდება რუსეთთან ფრონტის ხაზზე?.. არც არაფერი კი არა, ბევრი რამ – კერძოდ – მაყურებელი ვეღარ ნახავს დაახლოებით 15-20 ძალიან კარგ გადაცემას! მათგან მინიმუმ ათში ობიექტური ანალიზია! ანტირუსეთული მესიჯებია! კორუფციის მხილებაა! მსჯელობაა! დისკუსიაა! ისტერიკა არაა! და ა.შ. ეს კი ძალიან, ძალიან აწყობს დღევანდელ ხელისუფლებასაც და… რუსეთსაც!

და ბოლოს, ჩემი აზრი გამოსავალზე!

უშუალოდ “ფორმულამ” უნდა განაგრძოს მუშაობა ჩვეულ რეჟიმში! და არათუ არ უნდა აიცილოს კეზერაშვილის თემა, არამედ, უნდა იყოს კრიტიკული მის მიმართაც (დარწმუნებული ვარ, ამის აუცილებლობა ესმის თავად კეზერაშვილსაც)! უფრო ზუსტად, “ფორმულა” უნდა იყოს მთავარი დაინტერესებული იმით, რომ სიმართლე გაირკვეს! მე მგონია, რომ ამგვარ სარედაქციო პოლიტიკას “ფორმულა” უკვე მისდევს! ამას უკვე ახერხებს! (“ფორმულა” გახსნილია კრიტიკის მიმართაც).

მეორე – კეზერაშვილი თავად უნდა ეცადოს სიმართლის დამტკიცებას (მტკიცების ტვირთი გამოძიებაზეა)! ანუ – გადაგორდა და სხვა თემაა აქტუალურიო, ასე კი არ უნდა იფიქროს/იმოქმედოს, არამედ, ბრიტანულ! ბრიტანულ გამოძიებას უნდა დაუმტკიცოს თავისი უდანაშაულობა და მოხსნას ყველა შესაძლო უხერხული კითხვა! (მისი განცხადება თანამშრომლობის თაობაზე მიდასტურებს, რომ ასეც იქნება) და თუ ვერ მოხსნის… ყველასთვის იქნება ცუდი – მისთვის! “ფორმულასთვის”; “ფორმულას” ინდივიდებისათვის (რომელთა ნაწილიც აღარ მოინდომებს თანამშრომლობას); ანტირუსეთული ფრონტისთვის, რომელსაც “ფორმულა” ან გამოეცლება, ან ამ ბრძოლაში იქნება სუსტი “ფორმულა”…

პირადად მე, ცხადია, ვრჩები “ფორმულაში”… და სიმართლის გარკვევას ვუსურვებ ყველას! საკუთარი უდანაშაულობის სამართლებრივ დამტკიცებას ვუსურვებ კეზერაშვილს! “ფორმულას” სტაფს ვუსურვებ არ გატეხვას! მაგრამ, ასევე, საკუთარი რეპუტაციის მოფრთხილებას! კონიუნქტურის არგათვალისწინებას! და ბრძოლას! ერთიანს და ინდივიდუალურს!

პირადად მე ყველაფერს გავაკეთებ იმისათვის, რომ რუსული რეჟიმი აქ დასრულდეს! რაც გაცილებით მნიშვნელოვანია ვიდრე ერთი კეზერაშვილის სიმართლე/მტყუანობა! ტაბლიაშვილის აზრები! და ყველაფერი, რაც ამ თუ სხვა ამბავთან მიმართებაში ხდება!”- წერს ირაკლი ტაბლიაშვილი.

სხვა ამბების წაკითხვა