გარდაიცვალა საქართველოს კალათბურთის ეროვნული ნაკრების ყოფილი წევრი, საქართველოს სამგზის ჩემპიონი რამაზ გოგობერიშვილი. ინფორმაციას საქართველოს კალათბურთის ფედერაცია ავრცელებს.
დიდი ტრაგედია დაატყდა თავს რუსთავის და ზოგადად ქართულ საკალათბურთო სამყაროს. 51 წლის ასაკში გარდაიცვალა საქართველოს ეროვნული ნაკრების ყოფილი წევრი, საქართველოს სამგზის ჩემპიონი, რუსთავული კალათბურთის ერთ-ერთი ყველაზე თვალსაჩინო წარმომადგენელი, რამაზ გოგობერიშვილი.
საქართველოს კალათბურთის ეროვნული ფედერაცია ღრმა მწუხარებას გამოხატავს რამაზის გარდაცვალების გამო, თანაუგრძნობს მის ოჯახს, მეგობრებს, ახლობლებს, რუსთავისა და მთლიანად ქართულ საკალათბურთო საზოგადოებას
რამაზ გოგობერიშვილის კარიერის მნიშვნელოვანი ეპიზოდები:
– 16 წლისა ჩაირიცხა თბილისის “დინამოს” დუბლებში, ხოლო 17 წლისამ “დინამოს” ძირითად გუნდში საბჭოთა კავშირის ჩემპიონატის მატჩებში მიიღო მონაწილეობა.
– დამოუკიდებელი საქართველოს ჩემპიონატში სამ კლუბში უთამაშია: რუსთავის “აზოტში” (მოგვიანებით “ენერჯი–ინვესტი”), ტექნიკური უნივერსიტეტის გუნდ „სტუ-ჯეოსელსა“ და თბილისის “დინამოში”.
– 90–იანი წლების შუაწელში თამაშობდა საბერძნეთის “პაოკსა” და “მენტში”, ასევე გამოდიოდა პორტუგალიის უმაღლესი ლიგის კლუბ “ავეიროში”
სანაკრებო კარიერა: 1998–2002 წლებში იყო საქართველოს ეროვნული ნაკრების წევრი. უთამაშია საბჭოთა კავშირის ასაკობრივ ნაკრებში
მიღწევები: საქართველოს სამგზის ჩემპიონი, ორგზის თასისა და ორგზის სუპერთასის მფლობელი. დუდუ დადიანისა და ქორქია–საკანდელიძის მემორიალის სამგზის გამარჯვებული”- ნათქვამია ფედერაციის განცხადებაში.
გიორგი ლაღიძე არის Multimedia.ge-ს დამფუძნებელი და მთავარი რედაქტორი.
ინტერნეტ რესურსი 2018 წლიდან ფუნქციონირებს