არ დამრჩა შთაბეჭდილება, რომ გუშინ ეთერში ირაკლი ღარიბაშვილი იყო თავისუფალი – ეკა ბესელია

369
წაკითხვა/ნახვა
IMG.GE
IMG.GE

დეპუტატმა და ქართული ოცნების ყოფილმა წევრმა ეკა ბესელიამ, გადაცემა რეაქციაში” ირაკლი ღარიბაშვილის ინტერვიუ შეაფასა, მისი თქმით, დარჩა განცდა, რომ  ის არ იყო თავისუფალი და ახმოვანებდა კონკრეტულ გზავნილებს.

„მე ყოველთვის თავისუფალი ვიყავი და ყოველთვის თავისუფალი ვარ, როდესაც გადაწყვეტილებებს ვიღებ.

იმას ვამბობ, რაც მწამს და მჯერა. ნამდვილად არ დამრჩა შთაბეჭდილება, რომ გუშინ ეთერში ირაკლი ღარიბაშვილი იყო თავისუფალი. განცდა დამრჩა, რომ ის იმ გზავნილებს ახმოვანებდა, რაც უნდა გაეხმოვანებინა.

მისი განცხადებები ძალიან წინააღმდეგობრივი იყო. მე მას მინდა ვუთხრა, რომ “ნაციონალური მოძრაობის” წინააღმდეგ ბრძოლა მან, პირველ რიგში, პარტია “ქართული ოცნებიდან” უნდა დაიწყოს, სადაც საკმაოდ დიდი დოზით არიან “ნაციონალური მოძრაობის” სულიერი მხარდამჭერები, ჯერ კიდევ ნოსტალგიაში მყოფი ადამიანები, ზონდერებიც და ის ადამიანები, ვისთანაც ჩვენ თანაცხოვრებას ვერაფრით ვერ მოვახერხებდით. სწორედ იმ სასტიკი ძალადობრივი რეჟიმის გაგრძელება არიან ის მოსამართლეები, რომელთა მიმართ ჩვენ უნდობლობა გამოვხატეთ.

თუ წარსულის ძალადობრივ სისტემას ემიჯნები, მაშინ ამ ყველაფრის გაგრძელება არის სწორედ იმ ძალადობრივი სისტემის მთავარი შემსრულებლები, არა მხოლოდ პოლიტიკური პირები, არამედ ის მოსამართლეები, რომელთა ხელით არაერთი ჩვენი მოქალაქე იტანჯებოდა.

ლოგიკა წყდება იქ, როდესაც ამბობ, რომ მე წარსულს და ძალადობრივ სისტემას ვემიჯნები, მაგრამ თუ დღეს ისინი ჩემთან არიან, მათ ყველაფერს პატიობ, რასაც წარსულში ჩადიოდნენ. საზოგადოების დიდმა ნაწილმა, რომელიც იმ ძალადობრივი სისტემის მსხვერპლი იყო, მათ არ აპატია. ამიტომ, პერსონალური ინდულგენციებს ვერავინ ვერ გასცემს.

მე მესმის, რომ მას გული სწყდება, რატომ წავედი პარტიიდან. თავის დროზე ის პრემიერობიდან რატომ წავიდა? მან ხომ თქვა, რომ ის თავისით წავიდა. მე რისთვისაც წავედი, ეს ავხსენი.

არსად არ წავედი, დავრჩი იქ, სადაც მუდმივად ვიყავი, პრინციპების ერთგული დავრჩი. პირადი მოტივით მოქმედი პოლიტიკოსი თანამდებობაზე დარჩებოდა და თვალს დახუჭავდა იმაზე, რაზეც სთხოვდნენ. ეს გადაწყვეტილება მე მივიღე და არა ვინმე სხვამ,” – განაცხადა ეკა ბესელიამ.

თქვენი კომენტარი?
IMG.GE